Pinaigting ng Pamahalaang Panlalawigan ng Misamis Occidental at Kagawaran ng Edukasyon ang paghahanda para sa Palarong Pampook 2024 sa Catarman, Camiguin nito lamang ika-11 ng Mayo 2024.
Ayon kay Gain Paul de Barras, kasalukuyang Provincial Sports Coordinator, lahat ng 24 na sports events ng Northern Mindanao Regional Athletic Association (NMRAA) 2024 ay nilalahukan ng ONE ASENSO MISAMIS OCCIDENTAL Provincial Athletics Associations.
Dagdag pa rito, kasunod ng matagumpay na pagpupulong sa probinsya noong Pebrero 2024, patuloy ang pagsisikap na mas mahasa pa ang kakayahan ng mga atleta sa pamamagitan ng isang In-House Training Program na isinagawa sa Misamis Occidental Provincial Athletic Complex at umaabot hanggang sa Catarman, Camiguin, kung saan gaganapin ang NMRAA 2024.
Binigyang-diin ang tulong at suporta mula kay Governor Henry Sevilla Oaminal kasama ang mga Opisyal ng Lalawigan at bawat yunit ng lokal na pamahalaan na naging instrumento sa pagpapalakas ng moral at sigasig ng One Asenso Misamis Occidental Contingent.
Ang sama-samang pagsisikap ng Pamahalaang Panlalawigan at ng Kagawaran ng Edukasyon ay nagpapahiwatig ng pangako sa pagpapalawak ng talento, lakas at husay ng mga atleta sa Lalawigan ng Misamis Occidental.
Panulat ni Rizza Sajonia