Gipakusgan sa Cateel Local Government Unit ang mobility pinaagi sa pag-donate ug Bajaj Maxima Cargo arun magamit sa mga miyembro sa Revitalized- Pulis sa Barangay (R-PSB) Cluster 4 sa Cateel, Davao Oriental.
Ang maong sakyanan kasamtangan nga gigamit sa RPSB Cluster 4 nga adunay logo sa kapulisan arun maserbisyuhan ang katawhan sa maong lugar. Kini dakong tabang tungod maka-agi kini sa hilit nga lugar ug mahimong mo dala sa mga produkto sa mga mag-uuma labi na sa dalan sa kabukiran nga ang maka-agi lang kay ang kabaw ug baka.
Ang maong sakyanan wala gipalit sa Philippine National Police apan kini gidonar ug kasing-kasing nga gihatag sa Municipal Government of Cateel ubos sa pagpangulo ni Mayor Emilou C. Nuñez, arun mas mopalambo ug paspas ang serbisyo ug pag-alagad sa katawhan.
Kini ni-trending man tuod sa social media, diin lain-lain ang mga reaction sa netizen. Ang uban gikataw-an ug ang uban gi-isip nga dili kini makatabang, peru para sa lumulupyo sa hilit nga lugar, dako na ning tabang labi na sa mga pulis nga wala’y lain nga tumong ug tinguha kundili mag-alagad sa katawhan.
Ang Police Regional Office 11 sa ilalom sa liderato ni PBGEN Benigno L Guzman, Acting Director, naghatag ug dakong pasalamat ug pagtahod sa Cateel LGU. Kini mao ang pruweba nga ang PNP ug LGU, nagtinabangay arun mahatag ang tukmang serbisyo publiko para sa katawhan arun makab-ot ang kalamboan sa atung yutang natawhan.