Gipasalig sa Philippine National Police (PNP) ubos sa liderato ni PGen Jose Melencio C. Nartatez Jr., Chief, PNP, nga naplastar na ang tanang gikinahanglang lakang ug pwersa aron masiguro ang seguridad, kahusay, ug kaluwasan sa publiko ug mga delegado para sa umaabot nga Association of Southeast Asian Nations (ASEAN) Summit.
Sumala sa pamunoan sa nasudnong kapulisan, liboan ka mga personahe ang ipakatap sa mga nag-unang lugar nga pahigayonan sa mga tigom, sa mga ruta nga agian sa mga convoy, ug sa mga hotel nga puy-an sa mga lider sa nasud ug uban pang tag-as nga opisyal.
Gawas sa pisikal nga presensya sa mga pulis sa kadalanan, gipakusgan usab sa PNP ang ilang intelligence monitoring, cyber-security measures, ug pakig-alayon sa ubang ahensya sa gobyerno sama sa Armed Forces of the Philippines (AFP), Philippine Coast Guard (PCG), ug Metropolitan Manila Development Authority (MMDA).
Dungan niini, nanawagan ang PNP sa publiko nga makigtambayayong ug magmabinantayon. Giawhag ang mga lungsuranon nga ipahibalo dayon sa pinakaduol nga buhatan sa kapulisan ang bisan unsang kadudahang lihok o butang sa ilang palibot, ug planohon og sayo ang ilang mga biyahe aron malikayan ang kahasol sa gilaumang paghuot sa dagan sa trapiko.