Sa katapusang adlaw, mingbisita ang Caravan of Services karong adlawa Marso 27, 2026 sa Trade and Exhibition Center, Rotary Park sa Tagum City, Davao del Norte isip kabahin sa pagsaulog sa National Women’s Month.
Sa pagtapos sa Women’s Month, ang maong kalihokan nagtumong sa paghatag og nagkalain-laing serbisyo sama sa panglawas, panginabuhian, ug uban pang tabang nga makatampo sa kaayohan sa kababayen-an. Kini nga kalihokan gipasiugdahan sa Davao del Norte Provincial Council of Women, Inc. (DNPCWI) ug Tagum City Council of Women Foundation, Inc. (TCCWFI), uban sa suporta sa Lokal nga Panggamhanan sa Tagum aron mapalapdan ang serbisyo alang sa mga kababayen-an.
Gipahigayon usab ang She Can Hand Trade Fair, usa ka inisyatiba sa DNPCWI ug TCCWFI, diin sila namaligya og mga quality preloved items nga siguradong ma-enjoy sa mga mo-bisita.
Ang pagpalig-on sa kababayen-an dili lamang kutob sa ing-ani nga mga kalihokan, apan usa lang kini sa mga pamaagi aron mailhan ug mapasalamatan ang ilang dako nga papel sa komunidad.
