Patay ang usa ka mag-uuma human sa nahitabong pagpangdunggab sa iyang mismong igsuon adtong Bag-ong Tuig pasado 11:00 sa buntag Enero 1, 2025 sa Purok 7, Barangay Jasaan, Cabanglasan, Bukidnon.
Giila sa Cabanglasan Municipal Police Station, ang biktima nga si alyas “Mike” 22 anyos, ulitawo, mag-uuma ug ang suspek mao iyang manghod nga si alyas “Mark”, 20 anyos, ulitawo, mag-uuma ug pulos nagpuyo sa nahisgutang lugar.
Nahibal-an nga ubos sa ilimnong makahubog ang biktima ug pag-uli sa ilang balay, nagbangi kini sa iyang manghud ug matud pa, wala nakapugong ang maong suspek busa nikuha kini ug kutsilyo ug gidunggab ang biktima.
Naka-angkon ug samad-dinunggaban sa walang bahin sa dughan ang biktima nga mao ang hinungdan sa iyang hinanaling kamatayon.
Pagkahuman sa maong pagpangdunggab, ni-surrender ang suspek ug mag-atubang sa kasong Homicide.
Samtang ang Cabanglasan PNP, nag-awhag sa tanan nga dili magpa-ulipon sa gahom sa ilimnong makahubog. Ibutang kini sa tiyan ug dili sa atong utok ug dili ipataas ang garbo arun malikayan nga mawad-an kita sa mahal nato sa kinabuhi. Imbis maglipay ang maong pamilya tungod kay Bag-ong Tuig, napuno na hinuon kini sa kasubo.